'ఎర్రని గాజులు' అను ఒక బ్లాక్ బస్టర్.

తెలుగు సినీ పరిశ్రమ మొత్తం RS బ్రదర్స్ అవాక్కయ్యింది. సినీ విమర్శకులకి దిమ్మ తిరిగి మైండ్ బ్లాక్ అయింది. కొన్ని పాత ఙ్ఞాపకాలు గుర్తుకొచ్చి కొంతమంది సినీ ప్రేమికులకి వెన్నులో చలి, నెత్తి మీద ఎండ, కాలి కింద దురద ఒకే సారి పుట్టిన ఫీలింగ్ కలిగింది. వీటన్నిటికీ కారణం ఒక్కటే - పాపిరాజు మళ్ళీ వచ్చాడు. ఐదేళ్ళ క్రితం ఒక అనూహ్య సినిమా తీసి, కొన్ని అరుదైన రికార్డులని అడ్డదిడ్డంగా బద్దలుకొట్టి, కొన్ని అనివార్య పరిస్థితుల్లో అఙ్ఞాతంలోకి వెళ్ళిపోయి, ఇన్నేళ్ళుగా అదృశ్యమైన పాపిరాజు సడెన్ గా ఇన్నాళ్ళకి తెరమీదకి వచ్చాడు. వస్తూ వస్తూనే ఒక సంచలనాత్మకమైన కాంబినేషన్ కి తెరలేపాడు. తెలుగు సినీ పరిశ్రమ ని ఒక అత్యంత కీలకమైన మలుపు తిప్పబోయే రైటర్ గా అందరూ ఊహిస్తున్న యువ రచయిత హితేష్; చెప్పిన ప్రేమ కథనే మళ్ళీ చెప్పి, తర్వాతి సినిమా లో మళ్ళీ చెప్పి, ఒక్క లైను కూడా కథ మార్చకుండా మళ్ళీ మళ్ళీ చెప్పి, చెప్పిన ప్రతి సారీ బాక్సాఫీసుని చితక్కొట్టే ప్రేమకథల డైరెక్టర్ తేజస్వి ల కాంబినేషన్ లొ తన నాలుగో సినిమా అనౌన్స్ చేసాడు పాపిరాజు. విడి విడి గా హ్యాట్రిక్ హిట్లు కొట్టిన వీళ్ళిద్దరినీ తొలిసారి కలుపుతూ పాపిరాజు ప్రారంభించిన సినిమా అతనికి మంచి కం-బ్యాక్ ఫిలిం అవుతుందనే అందరూ అంచనా వేశారు. అయితే నాకు 'ఊహ' తెలిసినప్పటినుంచీ (అంటే ఇ.వి.వి. సత్యనారాయణ 'ఆమె ' సినిమా రిలీజ్ అయినప్పట్నుంచి) టాలీవుడ్ లో ఇలాంటి అంచనాలు 'నిజమ' వడం నేనెప్పుడూ చూడలేదు. ఇంతకీ ఈ సినిమా ఏమైందో తెలుసుకునే ముందు ఈ రైటర్, డైరెక్టర్, ప్రొడ్యూసర్ ల ప్రొఫైల్స్ కొంచెం మనం తెలుసుకోవాలి.

డైరెక్టర్ ప్రొఫైల్:
ఒక పల్లెటూరుంటుంది. అందులో ఒక రావి చెట్టు ఉంటుంది. దాని కింద మాత్రమే కూర్చుని తీర్పు చెప్పే ఒక రాయుడు గారు ఉంటారు. ఆయనకో కూతురుంటుంది. బీద రాములవ్వ కొడుకు ని ప్రేమిస్తుంది. హిట్టు. మళ్ళీ ఒక పల్లెటూరుంటుంది. ఒక మఱ్ఱి చెట్టుంటుంది. పొద్దస్తమానం దాని కింద కూర్చుని పేకాడే భూస్వామి ఉంటాడు. ఆయనకి కూతురుంటుంది. పాలమ్మే సీతక్క కి జులాయి తమ్ముడుంటాడు. మళ్ళీ హిట్టు. ఈ సారి వేప చెట్టుంటుంది. వేదాలు తెలిసిన సిద్దాంతి ఉంటాడు. ఆయనకో చిట్టి చెల్లెలు ఉంటుంది. వీళ్ళ పని మనిషి కొడుక్కి చిన్నప్పట్నుంచే ఫ్లూటు వాయించడం, పాటలు పాడటం, పొలాల్లో జామకాయలు దొంగతనం చేయటం వచ్చు. సూపర్ డూపర్ హిట్టు. ఇట్లా హిట్టు మీద హిట్టు తో హ్యాట్రిక్ కొట్టి మాంచి ఫాం లో ఉన్న స్టార్ డైరెక్టర్ తేజస్వి కి పాపిరాజుది నాలుగో సినిమా.

రైటర్ ప్రొఫైల్:
ఒక క్లాస్ రూం. మేడం పాఠం చెబుతోంది. స్టూడెంట్స్ శ్రద్ద గా వింటున్నారు. "ప్రేమ అనేది ఊహ కి సంబంధించింది. ఊహ అనేది ప్రేమ కి సంబంధించింది. ప్రేమ, ఊహ - ఈ రెండూ మనసు కి సంబంధించినవి" - ఇలాంటి ఎన్నో ఆణి ముత్యాల లాంటి డైలాగులు, సన్నివేశాలు హితేష్ గారి కలం నుంచి అలా అలా అలవోక గా జారిపడ్డాయి. అది ఏడో తరగతి అయినా, ఎమ్మెస్సీ అయినా ఎం.బి.బి.ఎస్. అయినా హితేష్ గారి కలం పదును లో ఏ మార్పూ వుండదు,చెప్పే పాఠం లో అస్సలు మార్పుండదు. '12వ తరగతి ' , '11వ తరగతి ', '10 వ తరగతి ' అని గత మూడు వేసవుల్లో మూడు బ్లాక్ బ్లస్టర్స్ ఇచ్చిన హితేష్ డైలాగుల్లో చాలా మటుకు కుర్రాళ్ళని ఉర్రూతలూగించాయి. ఆ మాటకొస్తే '12వ తరగతి' సినిమా క్లైమాక్స్ లో హీరో హీరోయిన్ లు కోర్టు లో జిల్లా జడ్జి తో వాదన లో గెలిచే సీన్, '11 వ తరగతి' క్లైమాక్స్ లో హీరో హీరోయిన్ లు హైకోర్ట్ జడ్జికే 'ప్రేమ' గొప్పదనాన్ని వివరించే సీన్, '10వ తరగతి' క్లైమాక్స్ లో హీరో హీరోయిన్ లు తమ ప్రేమ లోని ఒడిదుడుకులని ఎదుర్కొనే క్రమం లో సి.బి.ఐ. ని ఎలా బురిడీ కొట్టించిందీ చెప్పి 'సుప్రీం' జడ్జినే ఖంగు తినిపించే సీన్స్, కుర్రకారు లో ఒక దాన్ని మించి ఒకటి సెన్సేషనల్ హిట్ అయ్యాయి. ఇన్ని కళాఖండాలలాంటి కథలు, స్వాతిముత్యాల్లాంటి సీన్లు, రాసిన హితేష్ కి ఇది నాలుగో సినిమా.

ప్రొడ్యూసర్ ప్రొఫైల్:
గతం లో రెండు డబ్బింగ్ సినిమాలు, ఒక స్ట్రెయిట్ సినిమా తీసి చేతులు, పొలాలు, ఆస్తులు, ఇంటి దస్తావేజులు కాల్చుకుని ఐదేళ్ళ పాటు పత్తా లేకుండా పోయిన పాపిరాజుకి కూడా ఇప్పుడు తీయబోయేది నాలుగో సినిమాయే. నిజానికి పాపిరాజు మొదట తీసిన రెండు డబ్బింగ్ సినిమాల్లోనూ నష్టాలేమీ రాలేదు. అలాగని లాభాలూ కాదు. నో లాస్ నో గెయిన్ ప్లస్ దారి ఖర్చులు, భోజనం ఖర్చులకి డబ్బులొచ్చాయి. ఇలా గొర్రెబెత్తెడు లాభాలు కాదు ఏనుగు కుంభాన్నే కొట్టాలి అనుకుని ప్రముఖ మళయాళీ ఐటెం బాంబ్ రష్మి ని మెయిన్ లీడ్ లో పెట్టి, హిట్ స్ట్రీక్ లో వున్న ఒక మళయాళీ డైరెక్టర్ ని తెలుగు తెరకు పరిచయం చేస్తూ ఒక స్ట్రెయిట్ తెలుగు సినిమా స్టార్ట్ చేసాడు పాపిరాజు. ఆ సినిమా పేరు - 'పాప-పాప-పాప' .

సినిమా అనౌన్స్ చేయడం, ప్రారంభించడం, షూటింగ్ అయిపోవడం - అన్నీ చక చకా జరిగి పోయాయి. గప్ చిప్ గా షూటింగ్ జరుపుకున్నా, పెద్ద గా పబ్లిసిటీ చేయకపోయినా కూడా రిలీజ్ టైం కల్లా ఊహించని రీతి లో క్రేజ్ వచ్చింది సినిమా కి. అయితే ఏ మాటకామాటే చెప్పుకోవాలి. నిర్మాతలు పావలా పబ్లిసిటీ చేయకపోయినా కూడా సినిమా కి అంత క్రేజ్, అంత హైప్ క్రియేట్ అయిందంటే, నిజనికి ఆల్ ద క్రెడిట్ గోస్ టు మన తెలుగు కుర్రాళ్ళే. రష్మి, ఆ మళయాళీ డైరెక్టర్ కాంబినేషన్ సినిమా అనౌన్స్ అవగానే, అసలు ఆ మళయాళీ డైరెక్టర్ ఎవరు, ఆయన బాల్యమేవిటీ, ఆయన విద్యాభ్యాసమేవిటీ, ఆయన మునుపు తీసిన మళయాళీ సినిమాలు ఏవిటీ, వాటిల్లోని ప్రాముఖ్యమైన సన్నివేశాలు, క్లిపింగులు ఏవిటీ అనేది కొంత రీసెర్చి, కొంత గూగుల్ సెర్చి చేసి, రాబోయే సినిమా ఎలా వుండబోయే ఆస్కారముంది అని కొంత అవగాహన తెచ్చుకుని, పదిమందికీ చెప్పడం వల్ల అంత క్రేజ్ ఏర్పడింది ఈ సినిమాకి. అఫ్ కోర్స్, ఈ కాంబినేషన్ చూసి, 'పాప-పాప-పాప ' అనే టైటిల్ చూసి బోలెడు ఇన్-సైడ్ స్టోరీలు కూడా వచ్చాయి. కొందరేమో రష్మి ది ఈ సినిమా లో ట్రిపుల్ రోల్, బహుశా మల్టిపుల్ పర్సనాలిటీ డిజార్డర్ మీద సినిమా కావచ్చన్నారు. కొందరేమో, అదేం కాదు, రష్మి ది సింగిల్ రోలే కానీ మూడు డిఫరెంట్ గెటప్స్ ఉంటాయన్నారు. ఇంకొందరు - అసలు ఇది 1960 లో వచ్చిన ఇంగ్లీష్ మూవీ 'Kid, Child and a Baby' బేసిక్ లైన్ తీసుకుని స్టొరీ డెవలప్ చేసారంట అన్నారు. వీటన్నిటి మూలాన క్రేజ్ మరీ పతాకస్థాయి కి చేరింది. రిలీజ్ కి వారం ముందే ఈ సినిమాలోని కొన్ని క్లిపింగులు లీకయి, యూ-ట్యూబ్ లో అప్-లోడ్ అయ్యాయని రూమర్స్ వచ్చాయి. ఈ రూమర్స్ ని ఆ వీడియోస్ ని కలిపి నిరంతరవార్తాస్రవంతి ఛానెల్ '30 నిమిషాలు' ప్రోగ్రాం ని ప్రైం టైం లో ప్రసారం చేసింది. అయితే విఙ్ఞులైన తెలుగు కుర్ర ప్రేక్షకులు ఈ వీడియోలు కొత్త సినిమా లోవి కావనీ పోయినేడాది మళయాళం లో రిలీజ్ అయి, తెలుగు లోకి డబ్బింగ్ అవని రష్మి సినిమా లోని సన్నివేశాలని సునాయాసంగా పసికట్టేసి, ఇలాంటి జిమ్మిక్కులని పట్టించుకోకుండా ఒరిజినల్ పాప-పాప-పాప కోసం మరింత ఉత్సాహంగా ఎదురు చూసారు. ఏదైతేనేం ఆ రోజు రానే వచ్చింది. వేయి అమవాస్యల తర్వాత ఒకే పున్నమి వచ్చినట్టు, నూటా డెబ్బైనాలుగు మిగతా బస్సులు వెళ్ళిపోయిన తర్వాతే మనమెక్కాల్సిన ఆర్టీసీ బస్సు వచ్చినట్టు.

సినిమా రిలీజ్ అయింది. యూత్ జాతర. థియేటర్ దరిదాపు రోడ్లన్నీ జాం. ఒకటే కోలాహలం. ఎట్టకేలకు మార్నింగ్ షో మొదలయింది. దాంతోపాటే థియేటర్ కి వచ్చిన కుర్రాళ్ళ కంట రక్త కన్నీరు కూడా. యావత్ భారత దేశం లో గత రెండున్నర దశాబ్దాలుగా ఏ భాష లోనూ రానటువంటి నిఖార్సైన 'సమాంతర, న్యూవేవ్, సర్రియలిస్టిక్, నియోరియలిస్టిక్ నాన్-కమర్షియల్ ఆర్ట్ సినిమా' స్క్రీన్ మీద రన్ అవుతూంటే కక్కలేక, మింగలేక, గొంతుపూడుకుపోయిన టైం లో కరెక్ట్ గా తేలు కుడితే అరవడానికి కూడా వీలు లేకపోయినట్టుగా గిలగిలలాడిపోయారు కుర్రాళ్ళు. అన్నట్టు 'పాప-పాప-పాప' స్టోరీ చెప్పడం మరిచిపోయాను. ఈ సినిమా లో రష్మి మాంఛి బలమైన, బరువైన, దృఢమైన ....వ్యక్తిత్వం ఉన్న క్యారెక్టర్ చేసింది ముగ్గురు పిల్లల తల్లిగా. ఆమె తన ముగ్గురు పాపల్ని తీసుకుని అడవికి పిక్నిక్ కి వెళ్తుంది ఫస్ట్ సీన్ లో. అప్పుడు ఆ ముగ్గురు పాపలు అడవి లో తప్పిపోతారు.అక్కడ టైటిల్స్. చివరికి ఆ ముగ్గురు పాపలు (పాప-పాప-పాప) వాళ్ళ అమ్మని క్లైమాక్స్ లో కలుసుకునే ఉత్కంఠభరితమైన సీన్ సినిమా కి ఆయువుపట్టు. అయితే సినిమా ఆద్యంతం మళయాళ బాంబు రష్మి ఒకే ముదురు రంగు గళ్ళచీరలో డిగ్నిఫైడ్ గా కనిపించడం ఇంకొక ఆయువుపట్టు. ఇంటర్వల్ కి పావు గంటముందు పిల్లలు ఎంతకీ కనిపించని సన్నివేశం లో వచ్చే ట్రాజెడీ సాంగ్ ఒక ఆయువుపట్టు అయితే, ఆ సాంగ్ ప్లేబ్యాక్ రష్మి, ఆ మళయాళీ డైరెక్టర్ కలిసి పాడటం ఇంకొక ఆయువుపట్టు. ఈ ట్రాజెడీ సాంగ్ ట్యూన్ కొసం మ్యూజిక్ డైరెక్టర్ ఒక అయ్యప్పస్వామి భజన గీతాన్ని యాజిటీజ్ గా వాడేసుకోవడం ఇంకొక అసలైన ఆయువుపట్టు. అయితే ఒకే విడత లో ఇన్ని ఆయువుపట్లని తట్టుకోలేని తెలుగు కుర్రాళ్ళు కొంత వయొలెంట్ అయిపోయి దాదాపుగా మార్నింగ్ షో పడ్డ థియేటర్స్ అన్నింటిలోనూ తెరలు చించేసి, మాగ్జిమం ప్లేసెస్ లో ప్రొజెక్టర్ ఆపరేటర్ ని చితకబాదేసి, కొన్నిచోట్ల సైకిల్ స్టాండ్ కుర్రాణ్ణి చెట్టుకు కట్టేసి, ఇలా భిన్న రూపాలలో వాళ్ళ ఆవేదన వ్యక్తం చేసారు. హర్తాళ్ళు చేసి, ఆందోళనకి దిగి ఎలాగయితేనేం, మొత్తానికి రాష్ట్రం మొత్తమ్మీద ఎక్కడా మ్యాట్నీ షో పడకుండా బాక్సులు వెనక్కిపంపించేసారు. అప్పుడెప్పుడో మూడు దశబ్దాల క్రితం ఈవినింగ్ షో తర్వాత బాక్సులన్నీ వెనక్కి వెళ్ళిపోయి సంచలనం సృష్టించిన 'కాడెద్దు-ఎకరం నేల ' సినిమా రికార్డులన్నీ పాప-పాప-పాప సునాయసంగా తిరగరాసింది. పాపిరాజు జాతకం తిరగబడింది. అలా అప్పుడు తెరమరుగైన పాపిరాజు ఇన్నేళ్ళకి తెరపైకొచ్చి తన నాలుగో సినిమా అనౌన్స్ చేసాడు. అందుకే అంత సంచలనం.

సినిమా మొదలయింది:
హితేష్, తేజస్వి, పాపిరాజు ల కాంబినేషన్ లో సినిమా మొదలయింది. ఏదో స్కూల్ మూణ్ణెళ్ళకి అద్దెకి తీసుకున్నారు. డే టైంస్ లో 'కొన్ని క్లాస్ రూం సీన్స్ ' తీసారు. ఈవినింగ్ టైంస్ లో క్లాస్ రూం లో 'కొన్ని సీన్స్ ' తీశారు. ఉత్సాహంగా ఉల్లాసంగా సంతోషంగా ఆనందంగా షూటింగ్ జరుగుతోంది. సగం షూటింగ్ అయిపోయిందన్నారు డైరెక్టర్, రైటర్ వచ్చి. పాపిరాజు మొత్తానికి ధైర్యం కూడదీసుకుని డైరెక్టర్ ని అడిగేశాడు - 'ఇంతకీ మన సినిమా స్టోరీ ఏంటి ?' అని. 'కథ చెప్పాలంటే మూడ్ రావాలి' అన్నాడు డైరెక్టర్. వెంటనే ఒక రూం లోకి వెళ్ళి తలుపేసుకున్నాడు. గంట సేపు యోగా, గంట సేపు మెడిటేషన్, అరగంట గీతా పఠనం చేసి బయటికి వచ్చాడు. పాపిరాజు ని కూర్చోబెట్టుకుని కథ చెప్పాడు రెండు నిమిషాల్లో- "ఇదొక ఫుల్ ఫ్లెడ్జ్ డ్ యూత్ ఫుల్ కామెడీ, మిక్స్ద్ విత్ రొమాన్స్. సెమీ అర్బన్ సెమీ రూరల్ బ్యాక్ డ్రాప్. ఇంటర్వల్ కి ముందు చిన్న సస్పెన్స్ ఉంటుంది, క్లైమాక్స్ కి ముందు చిన్న సెంటిమెంట్ ఉంటుంది. ఇదీ మన కథ". ఒక్కముక్క కూడా అర్థం కాలేదు పాపిరాజుకి. నాకు పూర్తి కథ చెప్పమన్నాడు. పాపిరాజు వంక జాలిగా ఒక చూపు చూసి లేచివెళ్ళిపోయాడు డైరెక్టర్. కాసేపయాక రైటర్, డైరెక్టర్ పాపిరాజు దగ్గరికి వచ్చి గంభీరంగా బేస్ వాయిస్ లో కోరస్ గా అన్నారు - "మీరేమీ టెన్షన్ పడకండి రాజు గారూ, మన సినిమా ట్రెండ్ సెట్టర్ అవుతుంది".

ఈ లోగా లిరిసిస్ట్ చంద్రకాంత్ వచ్చాడు సెట్ కి. అతన్ని ఈ సినిమాకి టైటిల్ సజెస్ట్ చేయమని అడిగాడు డైరెక్టర్. అయితే ఆ టైటిల్ (1) ఇది రొమాంటిక్ లవ్ స్టోరీ అని జనాలకి అర్థం అయేలా వుండాలి. (2) క్యాచీ గా టీజింగ్ గా వుండాలి (3) సినిమా మీద క్యూరియాసిటీ పెంచేలా వుండాలి - అన్నాడు డైరెక్టర్. వెంటనే ఏ మాత్రం తడుముకోకుండా ఏ మాత్రం ఆలోచించకుండా అసలు ఆలోచనే లేకుండా ఒక టైటిల్ చెప్పాడు చంద్రకాంత్. ఒక్క క్షణం పిన్-డ్రాప్ సైలెన్స్. వెంటనే చప్పట్లతో మార్మోగిపోయింది అక్కడంతా. అంత ఇన్స్టంటేనియస్ గా అంత యాప్ట్ టైటిల్ ఇచ్చినందుకు పొగడ్తల్లో ముంచెత్తారు చంద్రకాంత్ ని అందరూ. అయితే ప్రొడ్యూసర్ మాత్రం టైటిల్ కొంచెం ఇబ్బందికరంగా వుంది, సెన్సార్ ప్రాబ్లెంస్ వస్తాయేమో అన్నాడు. చంద్రకాంత్ చిద్విలాసంగా నవ్వి, ఇంచుమించు ఇదే లైన్స్ లో తానే గతం లో ఒక సినిమా కి రాసిన పాట వినిపించాడు. అప్పుడా పాటని ఓకే చేసారు కాబట్టి ఇప్పుడు ఈ టైటిల్ ని కూడా చచ్చినట్టు ఓకే చేయాల్సిందే సెన్సార్ వాళ్ళు అని లాజిక్ తీశాదు. ఇంతకీ ఆ టైటిల్ చెప్పనేలేదు కదూ -

టైటిల్: వేయించుకుంటె బాగుంటది (కాప్షన్: ఎర్రని గాజులు నీ చేతికీ)

షూటింగ్ అయిపోయింది. సినిమా ని సెన్సార్ కి పంపించారు. 'న్యాయంగా ' అయితే 'కటింగ్స్ ' అవీ పోనూ సగం సినిమా మాత్రమే బయటికి వస్తుందన్నారు సెన్సార్ వాళ్ళు ( దాంతో పాటే - 'కటింగ్స్ ' అవీ పోనూ వాళ్ళ శాలరీ ఎంత తక్కువగా వస్తుందో కూడా చెప్పారు పాపిరాజుకి). సరే, బోర్డ్ మెంబర్లందరికీ 'తగిన న్యాయం' చేసాడు పాపిరాజు. క్లీన్- యు వచ్చింది. అయితే ఒక మహిళాధికారి మాత్రం టైటిల్ ఇబ్బంది గా వుంది, మార్చాల్సిందేనని పట్టుబట్టింది. స్వల్పమార్పులతో ఇంకొక టైటిల్ ఆమే సూచించింది. సరేనన్నాడు పాపిరాజు. అదే తన జీవితాన్ని మరోసారి మలుపు తిప్పబోతోందని ఆ క్షణాన పాపిరాజుకి తెలీదు. ఇంతకీ ఆమె సూచించగా ఫైనల్ గా ఖరారైన టైటిల్ :

టైటిల్: ఎర్రని గాజులు (కాప్షన్: నీ చేతికి బాగుంటాయి)

సెన్సార్ కూడా అయిపోయింది కాబట్టి ఆఖరిఘట్టం పోస్టర్ డిజైన్ చేసి, సినిమా రిలీజ్ చేయడం. డైరెక్టర్, రైటర్ తమ తదుపరి సినిమా కథ వండటానికి బ్యాంకాక్ వెళ్ళిపోయారు. వెళ్తూ వెళ్తూ ఒక అప్-కమింగ్, క్రియేటివ్, ఇన్నోవేటివ్ కుర్ర డిజైనర్ ని పాపిరాజుకి సజెస్ట్ చేసారు. కుర్రాడిలో ఏదో కొత్తగా చేయాలన్న తపన, తాపత్రయం విచ్చలవిడిగా వున్నాయి. గత ఏడాది చివర్లో - హీరోహీరోయిన్లని కానీ సన్నివేశాలని కానీ పోస్టర్ మీద చూపించకుండా కోతిబొమ్మలతో వెరైటీ పబ్లిసిటీ చేసి హిట్టు కొట్టిన 'నచ్చావులే ' సినిమా ప్రభావం కుర్రాడి మీద బాగా వుంది. పాపిరాజు టైటిల్ చెప్పగానే అదే తరహా లో ఒక పోస్టర్ డిజైన్ చేసాడు. పెద్ద పోస్టర్. చాలా పెద్దది. తెల్ల బ్యాక్-గ్రౌండ్. రకరకాల గాజులు. రంగు రంగుల గాజులు. చిట్టి చిట్టి గాజులు. మధ్యలో పెద్ద ఎర్ర గాజులు. పోస్టర్ రిలీజ్ చేసారు- రాష్ట్రమంతా.

సినిమా రిలీజ్ అయింది:
ఎక్కడా పోస్టర్ మీద హీరోహీరోయిన్స్ లేకపోవడం తో సినిమా జెనర్ అర్థం కాక కొందరు, ఎర్రని గాజులు అన్న టైటిల్ కి జడిసి కొందరు, పాపిరాజు గారి ప్రీవియస్ ఫిలిం దెబ్బనుండి ఇప్పటికీ కోలుకోక కొందరు - ఏదయితేనేం, మొత్తానికి యూత్ మొత్తం సినిమా కి మొహం చాటేసారు. అయితే, పోస్టర్, టైటిల్ చూసాక అనూహ్యంగా మహిళల్లో ఒక వర్గం ప్రేక్షకులు సినిమా మీద ఆసక్తి పెంచుకున్నారు. అందునా ప్రముఖ స్త్రీవాద రచయిత్రి బిపాసా దేవి గారు ఎర్రని గాజులు అన్న టైటిల్ మీద హర్షం ప్రకటించి, పోస్టర్ పట్ల సంతృప్తి వ్యక్తం చేసాక సినిమా పట్ల ఆ వర్గానికి ఆసక్తి ద్విగుణీకృతం అయింది. ఇంటలెక్చువల్ మహిళలు, మహిళా సంఘాలవాళ్ళు, రిటైరయాక సాంస్కృతిక రంగాల పట్ల ఆసక్తి పెంచుకున్న మహిళామణులు, మంచి సినిమా ని బతికించాలన్న ధ్యేయం కలిగిన కళాపోషకమారాణులు - తరలి వచ్చారు. మార్నింగ్ షో మొదలయింది. థియేటర్ మొత్తం తీవ్ర దిగ్భ్రాంతి కి లోనయింది. గత పదేళ్ళలో అడపాదడపా కొన్ని సినిమాలు చూసినట్లయితే అంతలా నిర్ఘాంతపోయేవాళ్ళు కాదేమో కానీ అక్కడికి వచ్చిన వాళ్ళలో చాలామంది చివరిగా చూసిన తెలుగు సినిమా 'అక్క పెత్తనం, చెల్లెలి కాపురం ' అంట. ఇంకేముంది, ఆర్నెల్ల కఠోర పథ్యం తర్వాత డైరెక్ట్ గా గొడ్డు కారం వేసిన మటన్ పులుసు తిన్న వాళ్ళలా అల్లాడిపోయారు. తెర మీద నడుస్తున్న 'సోషల్' ఫాంటసీ, 'సైన్స్' ఫిక్షన్, 'తెలుగు' క్లాస్ రూం థ్రిల్లర్ లోని 'ఇంగ్లీష్' సన్నివేశాలు చూడలేక బిక్కచచ్చిపోయారు. రాష్ట్ర చరిత్రలోనే మొదటి సారిగా అన్ని మహిళా సంఘాలు కలిపి ఒకే నిర్ణయాన్ని తీసుకున్నాయి. భీబత్సమైన పోరాటపటిమని ప్రదర్శించి రాష్ట్రం లో ఎక్కడా ఈ సినిమా ఇంటర్వల్ అయాక సెకండాఫ్ ప్రదర్శించకుండా చేసి, ఇంటర్వల్ కే బాక్సులన్నీ వెనక్కి పంపించేసారు. ఆ విధంగా 'పాప-పాప-పాప ' తో మార్నింగ్ షో తర్వాత బాక్సులు వెనక్కి వచ్చి రికార్డ్ క్రియేట్ చేసిన పాపిరాజు తన రికార్డుని తానే బద్దలు కొట్టుకున్నాడు.

ఆ తర్వాత చాలా పరిణామాలు జరిగాయి. అయితే పాపిరాజు కి ఒక చిన్న డౌట్ మాత్రం మిగిలిపోయింది. తన జీవితం సగమే నాశనం అయిందా లేక సర్వనాశనం అయిందా అని. ఈ లోగా ఎవరో వచ్చి చెప్పారు - "సార్, మీ సమగ్ర ఇంటర్వ్యూ కోసం 'ఫిలింగోయర్ ' వెబ్సైట్ నుంచి ప్రముఖ జర్నలిస్ట్ 'విభు' గారొచ్చారు" అని.

డౌట్ తీరిపోయింది పాపిరాజుకి.

యండమూరి " వీళ్ళని ఏం చేద్దాం?" - అబ్సర్డ్ రివ్యూ.

మొన్నీమధ్య హైదరాబాద్ వెళ్ళినప్పుడు తెచ్చుకున్నాను ఈ పుస్తకాన్ని. దాదాపు పదేళ్ళ విరామం తర్వాత యండమూరి వ్రాసిన నవల ఇది. ఈ పదేళ్ళూ విజయానికి 5 మెట్లు, విజయానికి ఆరో మెట్టు, విజయం లో భాగస్వామ్యం..ఇత్యాది 'విజయ 'వంతమైన పుస్తకాలు వ్రాస్తూ నవలలు గట్రా పూర్తి గా పక్కన పెట్టేసిన యండమూరి, ఈ సారి కొత్తగా 'అబ్సర్డ్ థ్రిల్లర్ ' అంటూ వచ్చాడు 'వీళ్ళని ఏం చేద్దాం' తో! మరి ఈ అబ్సర్డ్ థ్రిల్లర్ ఎలా ఉంది, దాని కథా కమామీషు ఏంటో చూద్దాం.

అసలు ఈ 'అబ్సర్డ్ ' గోల ఏంటి??

అబ్సర్డ్ కథ, అబ్సర్డ్ నాటకం, అబ్సర్డ్ నవల అని మూడు ప్రక్రియల్ని ప్రస్తావించాడు యండమూరి ఇందులో.

అబ్సర్డ్ కథ - కథ లో కొన్ని సంఘటన ల కి లింకులు వుండవు. కావాలనే రచయిత ఆ విధంగా లింకులు తొలగిస్తాడన్న మాట. దాంతో పాఠకులు చదివేటపుడు ఒక రకంగా అయోమయం చెందుతారు. అలా అయోమయానికి గురి చేయడమే రచయిత ఉద్దేశ్యం కూడా.
అబ్సర్డ్ నాటకం - సామ్యూల్ బకెట్ వ్రాసిన 'వెయిటింగ్ ఫర్ గాడాట్' అనే అబ్సర్డ్ నాటకాన్ని ప్రస్తావిస్తాడు. ఆకులు రాలిపోయిన చెట్టు కింద ఇద్దరు వృధ్ధులు నిర్మానుష్యమైన రోడ్డు కేసి చూస్తూ మాట్లాడుకుంటుంటారు. వాళ్ళిద్దరూ ఒకరికొకరు తెలీదు. వాళ్ళిద్దరూ ఎదురు చూస్తున్నది మాత్రం గోడో అనే వ్యక్తి కోసం. ఆ వ్యక్తి ఎప్పుడు వస్తాడో, ఎక్కడికి వస్తాడో, ఎందుకు వస్తాడో ఇద్దరికీ తెలీదు. తెలీని వ్యక్తి రాక కోసం ఇద్దరు అపరిచితులు రెండు గంటల పాటు జరిపే అసంబద్ద సంభాషణే 'వెయిటింగ్ ఫర్ గాడాట్'. దీనికే సామ్యూల్ బకెట్ కి 1969 లో నోబెల్ ప్రైజ్ వచ్చింది.
అబ్సర్డ్ నవల - తెలుగు లో ఇంతకు ముందు అబ్సర్డ్ నవల అని క్లెయిం చేసుకుంటూ ఏదయినా నవల వచ్చిందో రాలేదో నాకు తెలీదు (నాకు తెలిసినంత వరకు రాలేదు..అట్ లీస్ట్ కమర్షియల్ నవలలలో). కాల పరం గా 'వీళ్ళని ఏం చేద్దాం' కథాంశం కొన్ని దశాబ్దాల క్రితం జరుగుతుంది. అయితే ఆయా సంఘటనల్లో సెల్ ఫోన్లు, వీడియో రికార్డింగ్ లు కథ లో భాగంగా కనిపిస్తాయి. ఆ రోజుల్లో మరి ఈ సెల్ ఫొన్లు వగైరా లేవు కదా అని మనం సందేహించే లోపే రచయిత మనల్ని హెచ్చరిస్తాడు - ఇది 'అబ్సర్డ్ రచన ' అని, ఇలాంటి అయోమయాలు ముందు ముందు చాలా వుంటాయి అనీ, అలాంటి లాజిక్ లు పక్కన పెట్టి చదవమనీ. అలాగే ఆ తర్వాత ఒక పేజీ పూర్తిగా మనం చదవలేనంత గా బ్లర్ అయి వుంటుంది. ప్రింటింగ్ మిస్టేక్ ఏమో అనుకుని ముందుకు సాగిపోతాం. మళ్ళీ తర్వాత రెండు పేజీలు ప్రింటింగ్ ఏమీ లేకుండా ఖాళీ గా వుంటాయి. పుస్తకం కొనే ముందు చూసుకుని వుండాల్సింది అనుకుంటాం. కానీ ఆ తర్వాత రచయిత సగర్వంగా ప్రకటించేస్తాడు - ఇవన్నీ ఉద్దేశ్యపూర్వకంగా చేసినవేనని. సస్పెన్స్ రివీల్ చేయడం ఇష్టం లేకనే ఒక సీన్ లొ పేజి మొత్తాన్ని బ్లర్ చేసారట. అబ్సర్డ్ రచన. రెండు పేజీలు ఖాళీ గా వదలడం కూడా అబ్సర్డ్ రచన లో భాగమేనట.

ఇంతకీ కథేంటి??

(spoilers ahead)

మహర్షి అనే రచయిత మరణించి భగవంతుని దగ్గరికి వెళ్తాడు. అక్కడ ఆల్రెడీ తన కన్నా ముందు వచ్చిన ఒక నలుగురిని భగవంతుడు చెడామడా తిడుతుంటాడు. ఆ నలుగురూ జనాల సొమ్ము ని విపరీతంగా దోచుకుని నాలుగైదు తరాలకి విచ్చలవిడి గా ఖర్చు చేయడానికి సరిపడా సంపాదించిన -ఒక రాజకీయ నాయకుడు, ఒక కాంట్రాక్టర్, ఒక మాఫియా లీడర్, ఒక ప్రభుత్వ అధికారి. భగవంతుడు వాళ్ళ తో "మీరు మీకు, మీ పిల్లలకి సంపాదిస్తే చాలు. కానీ మీ మనవళ్ళకి, ముని మనవళ్ళకి సంపాదించవలసిన అవసరం ఏంటి? అది కూడా జనం ఉసురు పోసుకుని జనం సొమ్ము దోచిపెట్టి ఇవ్వాల్సిన అవసరం ఏంటి? మీరు సంపాదించి పెట్టిన సంపద ను ఇప్పుడు భూమి మీద మీ మూడో తరం (మనవళ్ళ కొడుకులు/కూతుళ్ళు) అనుభవిస్తున్నారు. మీరు సంపాదించిపెట్టిన భిక్ష ని అనుభవిస్తున్న వాళ్ళలో ఏ ఒక్కరి దగ్గరయినా కనీసం మీ ఫోటో వుంటే వెతికి పట్టుకుని తీసుకు రమ్మని అలా తీసుకు వస్తే శిక్ష తగ్గిస్తానని " సవాల్ చేస్తాడు. నెల రోజులు గడువిస్తాడు. నెల తర్వాత తాము సంపాదించినది అనుభవిస్తోన్న తమ వారసులకి ఎవరికీ తాము ఎవరో, ఎలా వుంటామో కూడా తెలీదని, ఒక్కరు కూడా కనీసం తమ ఫోటో దాచుకోలేదని తెల్సుకుని తీవ్ర నిరాశ తో భగవంతుని వద్దకి తిరిగి వచ్చి తాము గడిపినది నిరర్థకమయిన జీవితం అని అంగీకరిస్తారు. ఇక మహర్షి సంగతి. కీర్తి కండూతి లో పడి జీవితం లో (భార్య తో సహా) చాలా కోల్పోయిన ప్రతిభావంతుడైన రచయిత మహర్షి. భగవంతుడు అతనికి అప్పగించిన పని ప్రస్తుతం భూమి మీద వున్న భరద్వాజ అనే మరో ప్రతిభావంతుడైన రచయిత తో ముడిపడి వుంది.

సాహిత్య అకాడెమి అవార్డ్ గ్రహీత అయిన పాపులర్ రచయిత భరద్వాజ ని ఒక రాజకీయ నాయకుడు పిలిపిస్తాడు. తాను అంతు లేనంత ఆస్తి సంపాదించాననీ, తన పిల్లలు, పిల్లల పిల్లలు, తన సోదరుల మనవళ్ళు అందర్నీ రేపటి తన పుట్టిన రోజు కోసం పిలిపించాననీ, వాళ్ళని ఉద్దేశ్యించి తన పుట్టిన రోజున భరద్వాజ ను ఒక స్పీచ్ ఇవ్వమని కోరతాడు. విపరీతమయిన ఆస్తి రావడం వల్ల తన మనవళ్ళ తరం టీనేజ్ వచ్చే సరికే పూర్తి గా నాశనం అయిందనీ, తరం మొత్తం పూర్తిగా విలాసాల్లో మునిగి తేలుతూ ఉన్నారనీ, గంజాయి, హెరాయిన్, రేసులు, పేకాట, పిక్నిక్ లు, విదేశీ ప్రయాణాలు, గర్ల్ ఫ్రెండ్స్, బాయ్ ఫ్రెండ్స్, అబార్షన్స్, ఎయిడ్స్- ఇదీ వాళ్ళ జీవితం అనీ, జీవితం అంటే కేవలం విలాసం, ఆనందించడం మాత్రమే కాదు అని వాళ్ళకి అర్థం అయేలా చెప్పాలని అర్థిస్తాడు. అయితే భరద్వాజ కూడా ఇప్పుడిప్పుడే కీర్తి కండూతి ని వంటబట్టించుకుంటూ డబ్బు, గుర్తింపు తప్ప ప్రపంచం లో ఇంకేదీ అక్కర్లేదనే భ్రమ తో తన భార్యకి, కుటుంబానికి మానసికంగా దూరమవుతూ వున్నాడు. సో, భరద్వాజ కి సరయిన దిశా నిర్దేశం చేయడం, భరద్వాజ స్పీచ్ ద్వారా ఒక వంశం లో ని ఒక తరాన్ని జాగృతం చేయడం అనేది భగవంతుడు మహర్షి కి అప్పచెప్పిన కార్యం. దీన్ని మహర్షి ఎలా సాధించాడు అనేది పాఠకుడి ని కొంత అయోమయానికి గురి చేస్తూ, లాజిక్ కి అందీ అందకుండా అబ్సర్డ్ గా సాగుతూ ఒక చిన్న ట్విస్ట్ తో ముగుస్తుంది.

కమామీషు:

1. ఇందులో రచయిత చాలా సార్లు ప్రస్తావించే ఒక టాపిక్ - ఆంత్రొపాలాజీ. మానవుని ఆలోచనల్లో ని పరిణామ క్రమం. ఉద్యోగ వేట లో నగరానికి వచ్చి కొత్తగా వచ్చిపడ్డ స్వేచ్చ ని ఏం చేసుకోవాలో తెలీని అమ్మయిలు (ఈ సన్నివేశాలు యండమూరి వ్రాసిన 'లేడీస్ హాస్టల్' నవల కి కొనసాగింపు లాగా వుంటాయి), ఇటీవలి కాలం లొ సాధారణమైపోయిన ప్రేమ పేరిటి యాసిడ్ దాడులలోని అవతలి కోణం, కార్పొరేట్ కల్చర్ లో మనం తరచూ వినే ఆఫీస్ స్పౌజ్ సంస్కృతి, ఈ మధ్య యువతీ యువకుల్లో ఫ్యాషన్ అయిపోయిన లివ్-ఇన్ రిలేషన్స్ - వీటన్నిటినీ రచయిత చర్చించాడు, వీటి మీద చురకలు వేయడానికి ప్రయత్నించాడు.

2. విజయానికి 5 మెట్లు సహా యండమూరి వ్రాసిన పలు పుస్తకాల్లో కనిపించే 'మెటా ఫిజికల్ ఎంటీనెస్ ' అనే టాపిక్ ఈ పుస్తకం లో నూ రెండు మూడు చోట్ల కనిపిస్తుంది. బహుశా ఒక్కొక్క పాయింట్ ఆఫ్ టైం లో రచయిత కి ఒక్కొక్క ఫేవరెట్ టాపిక్ వుంటుందేమో. (అది అతని స్టేట్ ఆఫ్ మైండ్ టాపిక్ అనుకోవచ్చా?)

3. మనం చిన్నపుడు చదువుకున్న Ant & grasshopper కథ కి ఎక్స్టెన్షన్ లా గా వచ్చిన ఒక ఫార్వర్డ్ మెయిల్ చాలా మంది చదివే వుంటారు. కష్టపడని grasshoppers ని సపోర్ట్ చేసే మన ఉద్యమకారులమీద, రాజకీయ నాయకుల మీద సెటైర్ అది. దాన్ని యాజ్ ఇట్ ఈజ్ గా ఒక చోట వాడుకున్నారు.

4. ఇక కొన్ని కారెక్టర్స్ ని చూస్తే వాస్తవ జీవితం లోని కొందరు గుర్తుకు వచ్చారు. ప్రమోద్ మహాజన్, రాహుల్ మహాజన్ ల జీవితాల్లోని సంఘటన లని మిక్స్ చేసి ఒకే కారెక్టర్ గా రూపొందించినట్టు అనిపిస్తుంది ప్రమోద్ బానీ అనే స్పాయిల్డ్ బ్రాట్ కారెక్టర్ ని చూస్తే. అలాగే విశ్వనాథ రెడ్డి అనే కాంట్రాక్టర్ పాత్ర చూస్తే ఎందుకో టి. సుబ్బిరామిరెడ్డి గుర్తుకు వచ్చాడు.

5. వెన్నెల్లో ఆడపిల్ల (పొయెటిక్ లవ్ స్టోరీ), అంతర్ముఖం (ఫిలసాఫికల్ స్టోరీ) , తులసీ దళం (హారర్/ క్షుద్ర) లాంటి ఇంటరెస్టింగ్ గా వుంటూనే జెనర్ ని కరెక్ట్ గా కన్వే చేయగలిగిన టైటిల్స్ తో పోలిస్తే "వీళ్ళని ఏం చేద్దాం" అనేది చాలా సాదసీదా టైటిల్ లా అనిపించింది నాకు. కనీసం ఫిక్షనా నాన్ ఫిక్షనా అన్నది కూడా టైటిల్ ని చూసి గెస్ చేయలేం.

6. మొదట్లో భగవంతుని తో ఆర్గ్యుమెంట్స్, ప్రతినిధి-4 వగైరా ల అతీంద్రియ శక్తులు - మనం వద్దనుకున్నా యండమూరి నవలలు అంతర్ముఖం, థ్రిల్లర్ (ముత్యమంత ముద్దు సినిమా) లని గుర్తు చేస్తాయి. అయితే నవల రెండో భాగం లో ఎక్కువగా (కథాంశం రీత్యా) రచయితల ఆలోచనాతీరు నీ, రచయితల ప్రపంచాన్నీ ప్రెజెంట్ చేస్తాడు. కొంతమందికీ ఆసక్తికరంగా వుంటుంది, కొంతమంది కి పేజీలు తిప్పేద్దామనిపిస్తుంది. అదీ కాక చెప్పాల్సిన అంశం కంటే చెప్పే విధానమే ఎక్కువ ఆసక్తి కలిగించడం చూస్తే 'అబ్సర్డ్ నవల ' అనే ప్రక్రియ ని తెలుగు పాఠకులకి రుచి చూపిద్దామనే ఉద్దేశ్యం తో మాత్రమే పుస్తకం వ్రాశారేమో అనిపించింది. ఏది ఏమయినా నన్ను మాత్రం ఏకబిగిన చదివించేసింది.

ఇంతకీ దీన్ని అబ్సర్డ్ రివ్యూ అని ఎందుకన్నట్టో??

నాకు తెలిసి అయితే నేను ఎటువంటి లింకులూ తొలగించలేదు ఈ రివ్యూ లో. పాఠకుల్ని ఉద్దేశ్య పూర్వకంగా అయోమయానికి గురి చేసే ఐడియా కూడా నాకయితే లేదు. అయినప్పటికిన్నీ నా అయోమయం వల్లనో, అనుభవరాహిత్యం వల్లనో, నాకు అంత 'సీన్' లేకపోవడం వల్లనో ఎక్కడైనా మీరు అయోమయానికి గురి అయితే లేదా ఈ రివ్యూ లో నేను ఏవయినా మిస్ చేసానని మీకు అనిపిస్తే దాన్ని నా మిస్టేక్ లా కాకుండా - రివ్యూయరే బా..గా.. ఇంటలెక్చువల్ గా ఆలోచించి ఆ లింకులు తీసివేసి వుంటాడని మీరు అనుకోవాలనేదే నా కుటిలమైన ఆలోచన..
అందుకోసమనే 'అబ్సర్డ్ రివ్యూ' అనే టైటిల్ పెట్టానన్నమాట!!(:-

చిరు పై నా మిత్రుడి పుస్తకం: కెరటం

గిరిధర్ గోపాల్ రాజు అని, ఇంజనీరింగ్ చదివే రోజుల్లో నాఫ్రెండ్. నిజానికి తను నాకు సీనియర్ అయినప్పటికీ, కూసింత కళా పోషణ మమ్మల్ని ఫ్రెండ్స్ ని చేసింది. కొన్ని స్కిట్స్ వగైరా నేను వ్రాసినవాటిని తను డైరెక్ట్ చేసాడు ఆ రోజుల్లో. సరే, ఈ "మరపు రావు కాలేజీ రోజులు" మాటలని కాస్త పక్కనపెట్టి విషయానికి వస్తే, గిరి కి మొదట నుంచీ కొంచెం కళాత్మకత,అంతకు మించి లైఫ్ లో ఏదైనా డిఫరెంట్ గా చేయలి అన్న తపన, ఈ రెండింటికి మించి చిరంజీవి మీద అభిమానం. సో, ఈ మూడు భిన్న ప్రవాహాలు వచ్చి ఒక త్రివేణీ సంగమం వద్ద కలిసి 'కెరటం' లా ఎగసి పడ్డాయనుకుంటా.

ఎవరి లైఫ్ లో వాళ్ళు,ఎవరి మెట్రో లో వాళ్ళు పడిపొవడం వల్ల గిరి ఈ పుస్తకం వ్రాయడానికి, దాన్ని పబ్లిష్ చేయించడానికి, రెండింటి కి మించి చిరంజీవి చేతుల మీదుగా నే ఈ పుస్తకం రిలీజ్ చేయించడానికి ఎన్ని తిప్పలు పడ్డాడో,ఎంత స్ట్రగుల్ అయ్యాడో నాకు తెలీదు కానీ -వూహించుకోగలను.

బేసిక్ గా ఈ పుస్తకం చిరంజీవి రాజకీయ ప్రవేశాన్ని స్వాగతించే యువత భావాలని ప్రతిబింబించే పుస్తకం . ఈ పుస్తకం నేనింకా చదవలేదు.మీరు ఎవరయినా చదివి వుంటే, మీ అభిప్రాయాన్ని పంచుకుంటే సంతోషిస్తాను.

ఆ పాత మధురాలు

మొన్న ఈమధ్య ఇంటికి వెళ్ళినప్పుడు మన పాత ట్రంకుపెట్టె తీస్తే బయటపడ్డాయి ఈ "ఆ పాత మధురాలు" . మిగిలినవి ఏమయ్యాయో బోధపడట్లేదు. సరే..ఉన్నవాటినైనా భద్రంగా భద్రపరుద్దామని ప్లస్ తోటి బ్లాగర్స్ తో పంచుకుందామని ఇక్కడ పోస్ట్ చేసా.ఎవరికైనా ఇది స్వోత్కర్ష లాగా అనిపిస్తే నా మీద విసుక్కోకుండా దయచేసి లైట్ తీసుకోండి..!

1. ఇది నేను తొమ్మిదో తరగతో పదో తరగతో చదివేటప్పటిది. ఆ రోజుల్లోనే మనం మణిరత్నం కి మాంఛి ఫ్యాన్ అన్నమాట. ఎవరో ఒకాయన మణిరత్నం ని విమర్శిస్తూ ఏదో ఆర్టికల్ వ్రాస్తే దానికి రిప్లయ్ గా మనం వ్రాసిన ఆర్టికల్ అన్నమాట ఇది. (ఆంధ్ర ప్రభ - 1994) (గమనిక: ఈ ఆర్టికల్ లో నేను వ్యక్తం చేసిన అభిప్రాయలు నా అప్పటి రోజుల అభిప్రాయాలు. వాటిలో కొన్ని అయితే ఇప్పటి నా అభిప్రాయాలకు పొంతన లేనివి కూడా వున్నాయి)

2. ఇది కూడ నేను 9 చదివే రోజుల్లోది. ఒక వ్యాసరచన పోటీ లో జిల్లా స్థాయి ప్రథమబహుమతి వస్తేనూ..(ఈనాడు 1994)

3. ఇంటర్ చదివేరోజుల్లో ఆంధ్రప్రభ లో ప్రచురితమైన ఒక ఉత్తరం చూసి..దానికి నా స్పందన..

4. ఇంటర్ రోజుల్లొ రాసిన రుక్కులు-

5. ఒక వ్యాసరచన పోటీ లో ఇంటర్ అప్పుడు ప్రైజ్ వస్తేనూ..

ఇలా అంటున్నానని కాదు కానీ ఏ మాటకి ఆ మాటే చెప్పుకోవాలి- స్కూల్, కాలేజ్ రోజుల్లో ఇలా అప్పుడప్పుడు పేపర్ లో పేరు చూసుకోవడం..అదొక మజా ఆ రోజుల్లో..!!!

అదండీ సంగతి..అలా జరిగిందప్పట్లో!

షేక్ సెబాస్టియన్ నాయుడు (ఫ్యాక్షన్ సినిమా స్టోరీ - 200 డేస్ 200 సెంటర్స్ )

ఉపోద్ఘాతం

' నరకానికి నాలుగు అడుగులు ' దాకా వెళ్ళి ఎలాగో బయటపడ్డాం, సినిమా అయిపోవడం తో. అప్పటికే ఆ సినిమా రిలీజ్ అయి చాలా రోజులు అయినా మేము సాహసం చేయలేదు. కాకపోతే కనబడ్డ ప్రతి ఒక్కడూ ఇండస్ట్రీ హిట్ అంటేనూ ధైర్యం చేసాం.సినిమా చూసాక నా ఆత్మ విశ్వాసం ఘోరంగా దెబ్బ తింది. అస్సలు అర్థం కాలేదు ఆ సినిమా ఎలా హిట్ అయిందా అని.

ఆ రాత్రి-
" బాసూ ఇక లాభం లేదు, మనలని ' నరకానికి నాలుగు అడుగులు ' దాకా తీసుకెళ్ళిన ఆ డైరెక్టర్ కి బుద్ది చెప్పాల్సిందే " అన్నాడు మా ఫ్రెండ్ .
"బుద్ది కాదు, కథ చెప్పాలి " అన్నాడు మా జూనియర్.

అలా మా విన్నూత్న వైవిధ్య ఫ్యాక్షన్ కథ కి అంకురార్పణ జరిగింది.
*********
కథ
అన్ని ఫ్యాక్షన్ సినిమాల్లాగే మన సినిమా కూడా సీమ లో కాకుండా వేరే చోట (ఈ సారి వెరైటీ గా ఒరిస్సాలో ) మొదలవుతుంది.

సెబాస్టియన్ (హీరో) ఒరిస్సా లో ఒక జిం పెట్టుకుని తన ఆరేళ్ళ కొడుకు తో పాటు వుంటాడు. ఆ జిం లో అమ్మాయిలు, అబ్బాయిలు అందరికీ కామన్ ట్రైనర్ మన హీరో యే. యాజ్ యూజువల్ హీరోయిన్ కూడా ఇదే జిం. ఒక సారి హీరోయిన్ ఏదో ఎక్సర్సైజ్ చేస్తుంటే (ఆ అమ్మాయి బాగానే చేస్తుంటుంది) హీరో వచ్చి ఇది ఇలాగేనా చేయడం అని క్లాస్ పీకి, అది చేయాల్సింది అలా కాదు ఇలా అని చెప్పి (ఆమె కంటే వరస్ట్ గా ) చేసి చూపిస్తాడు. అపుడు హీరోయిన్ 'వ్వావ్ వ్వాటే పవర్' అని ఆశ్చర్యపడుతుంది. కట్ చేస్తే పాట - స్విట్జర్లాండ్ రోడ్డు మీద -
అ: ఓసి నా చద్దన్నం ముద్దా,
నా పవరంటే నీకంత ముద్దా
ఆ: నువ్వే రా జిం లో ట్రైనరు,
నువ్వే నా సోకులకి ఓనరు ...

అలా రోజు జిం లో చేసే ఎక్సర్సైజు లు నాలుగు రోడ్డు మీద చేసాక పాట అయిపోతుంది.

పాట అయిపోగానే బాగా గుబురు గెడ్డం, మాసిన జుట్టు వున్న పది మంది 'ఒరియా 'రౌడీ లు వచ్చి వెంటనే ఆ ప్లేస్ ఖాళీ చేయమని 'ఈనాడు ఎడిటోరియల్ ' లో వ్రాసే తెలుగు భాష లో హీరో కి వార్నింగ్ ఇస్తారు. వెంటనే ఏ మాత్రం ప్రతిఘటించకుండా హీరో సామాను సర్దుకుంటుంటాడు. అప్పుడు హీరోయిన్ వచ్చి 'ఏం వాళ్ళకు భయపడుతున్నావా, వాళ్ళని ఎదిరించే దమ్ము నీకు లేదా, వొంటి మీద కండలు కాదు మనిషి కి కావలసింది, గుండెల్లో దమ్ము ' అని హీరో ని రెచ్చగొడుతుంది. అయితే హీరో ఒక చిరునవ్వు నవ్వి మళ్ళీ సామాను సర్దుకుంటుంటాడు. ఇంతలో హీరోయిన్ తన అంకుల్, పోలీసాఫీసర్ పట్నయక్ కి కాల్ చేస్తుంది. పట్నయక్ ని చూసి కొయ్యబారిన రౌడీలు క్షమించమని ఆయన కాళ్ళ మీద పడుతుంటే పట్నాయక్ మాత్రం వాళ్ళని వదిలించుకుని వచ్చి హీరో కాళ్ళ మీద పడతాడు. హీరోయిన్ షాక్.
'మీ లాంటి గొప్ప మనిషి...' అని సగం డైలాగు పైకి చెప్పి మిగిలిన సగం లోపల గొణుక్కుంటూ వెళ్ళిపోతాడు. రౌడీలు కూడా వెళ్ళిపోతారు.

హీరోయిన్ మాత్రం హీరో దగ్గరకి వచ్చి, 'నువ్వు మామూలోడివి అయివుండవు, నీకు గ్యారంటీగా ఫ్లాష్ బాక్ వుండే వుంటది, అది నాకు చెప్పు ' అని సతాయిస్తుంది. హీరో ఏమో అదేమీ లేదు అని చెప్పి తప్పించుకుందామని ట్రై చేస్తాడు. కానీ హీరోయిన్ నువ్వు మర్యాదగా ఫ్లాష్ బాక్ అయినా చెప్పు లేదా నా ఈ క్రింది ప్రశ్నలకి సమాధానం అయినా చెప్పు అని నిలదీస్తుంది.(రెండూ ఒకటే!!)
1. ఒరిస్సా ని గడగడలాడించే ఐ.పి.ఎస్. పట్నాయక్ నీ కాళ్ళకి ఎందుకు దణ్ణం పెట్టాడు.
2. నీ ఈ బిడ్డ కి తల్లి ఎవరు. ఆమె ని ఫ్లాష్ బాక్ లో ఎందుకు చంపారు, ఎవరు చంపారు, ఎలా చంపారో క్లుప్తం గా వివరించు.
3. నీ అసలు పేరు ఏంటి. నీకు సెబాస్టియన్ అనే పేరు ఎందుకు కలిగింది.

కట్ చేస్తే కొండ మీద హీరో హీరోయిన్. బ్యాక్ డ్రాప్ లో ఎగిరి వచ్చే అలలు.
ఫ్లాష్ బాక్ స్టార్ట్:

హీరో వాళ్ళ ఫ్యామిలీ మొత్తాన్ని ఫ్యాక్షనిస్ట్ విలన్స్ చంపేస్తే ఏడేళ్ళ 'శివయ్య నాయుడు ' మాత్రం తప్పించుకుని ఏదో ట్రైన్ ఎక్కి ముంబై పారిపోతాడు. అక్కడ పెరిగి 20 ఏళ్ళయాక ఒక అమ్మాయిని లవ్ చేస్తాడు. ఒక సాంగ్ కూడా అయాక తెలుస్తుంది ఆ అమ్మాయిది కూడా 'సీమ ' యేనని. సీమ లో ఫ్యాక్షనిస్ట్ ఓబుల్ రెడ్డి (అవును ఓబుల్ రెడ్డి యే) ఆమె మీద కన్నేసి ఆమె ఫ్యామిలీ మొత్తాన్ని చంపేస్తే ఆమె తప్పించుకుని ముంబై వచ్చి వుంటుంది. వీళ్ళిద్దరూ పెళ్ళి చేసుకుందామనుకునే టైం కి ఆ అమ్మాయిని ఓబుల్ రెడ్డి కిడ్నాప్ చేసి సీమ కి ఎత్తుకెళతాడు. ఆ అమ్మాయి కోసం హీరో సీమ లోకి ఎంటర్.

హీరో ట్రైన్ దిగి వూళ్ళోకి రాగానే అందరూ ఆశ్చర్యంగా ఆనందం గా వింత గా హీరో నే చూస్తూ వుంటారు. ఇంతలో ఒక ముసలావిడ పరుగెత్తుకుంటూ వచ్చి "శివయ్యా ఇంత కాలం ఏమయిపోయావయ్య, అచ్చు మీ నాన్న పోలికలే, ఎంతయినా మీ వంశమే వంశం, ఇంక మా కష్టాలన్నీ తీరిపోయాయి" అని ముందు డైలాగు కి వెనుక డైలాగు కి సంబంధం లేకుండా 5 నిమిషాలు ఎమోషనల్ గా మాట్లాడుతుంది. ఒక ముసలాయన వచ్చి " బాబూ నువ్వు ఏ నాటికైనా వస్తావని మాకు తెలుసు బాబూ, కాకపోతే నువ్వు ప్రొద్దున 7:30 రైలు కి వస్తావా, మధ్యాహ్నం 12:30 రైలు కి వస్తావా, రాత్రి 7:30 రైలుకి వస్తావా అని అందరం 20 ఏళ్ళ నుంచి ఎదురు చూస్తూనే వున్నాం బాబూ స్టేషన్ వైపు" అని కన్నీళ్ళ పర్యంతం అవుతుండగా, ఒక్క సారి గా వర్షం మొదలవుతుంది. వెంటనే పాట. ఓవరాల్ గా పాట కాన్సెప్ట్ ఏంటంటే -
'మన అన్న వచ్చేసాడు, ఇంక మన కష్టాలన్నీ తీరిపోయాయి. ఇప్పట్నుంచీ వూళ్ళో వర్షాలు రెగ్యులర్ గా పడతాయి. పంటలు పండుతాయి. శత్రువుల గుండెల్లో గూడ్సు రైళ్ళు పరుగెడతాయి ' వగైరా వగైరా .

ఇక ఆ ఓబుల్ రెడ్డి తనవాళ్ళని చంపిన వాడి కొడుకే అని తెలియడం, హీరో వాణ్ణి చంపి హీరోయిన్ ని పెళ్ళి చేసుకోడం చకా చకా జరుగుతాయి.అప్పుడు ఒక 500 మంది ని వేసుకుని సుమోల్లో కత్తులు తిప్పుకుంటూ హీరో మీదకి విలన్ వస్తాడు అన్ని ఫ్యాక్షన్ సినిమాల లో మాదిరిగా. అయితే హీరో వాళ్ళ మీద కి కత్తో కొడవలో తీసుకుని పోవడం కాకుండా,(ఈ సారి వెరైటీ గా) తన బ్యాగ్ లో నుంచి ఒక మెషిన్ గన్ తీసుకుని టుపుక్ టుపుక్ అని కాల్చి అవతల పడేస్తాడు అందరినీ. నెక్స్ట్ సీన్ లో ఫ్యాక్షనిస్ట్ విలన్స్ అంతా సమావేశం అయి అసలు వీడి దగ్గరికి ఆ మెషిన్ గన్ ఎలా వచ్చింది. అసలు ఈ 20 ఏళ్ళు వీడు ఎక్కడున్నాడు ఏం చేసాడు అని సందేహించడం తో (ప్రేక్షకులకి రిలీఫ్ ని ఇచ్చే)
ఇంటర్వల్.

****

ఇంక వూరిలో వాళ్ళ సమస్యలు తీర్చి హీరో 'పెద్దోడు ' అవడం, హీరొ భార్య ప్రెగ్నెంట్ అవడం, ఒక పాట , జరుగుతాయి.ఒక సారి హీరో ఏదొ జోక్ చెబితే పక్కనే వున్న కమెడియన్ గట్టిగా నవ్వుతాడు. హీరో వాణ్ణి దగ్గరిగా పిలిచి బాగా పరిశీలించి అడుగుతాడు - రేయ్, నీ పళ్ళ మీద ఆ గార ఏంట్రా? అని. అప్పుడు కమెడియన్ కళ్ళళ్ళో నీళ్ళు సుడులు తిరుగుతాయి. హీరో ని వున్నఫళంగా బయటికి తీసుకెళతాడు. అక్కడి నీళ్ళు చూపిస్తూ అంటాడు- అయ్యా ప్రపంచం మొత్తం మంచి నీళ్ళూ తాగి దాహం తీర్చుకుంటుంటే సీమ లో మాత్రం ఫ్లోరైడ్ నీళ్ళు తాగుతున్నాం అయ్యా ఫ్లోరైడ్ నీళ్ళు అని. అలాగే వూళ్ళోకి తీసుకెళ్ళి ఫ్లోరైడ్ నీళ్ళ వల్ల కీళ్ళు పట్టేసిన ముసలి వాళ్ళని, యూత్ లో నే రకరకాల అనారోగ్యాల పాలయిన యంగ్స్టర్స్ ని చూపిస్తాడు. అప్పుడు హీరో ఇన్నేళ్ళు గా సీమ వెనకబడిపోవడానికి కారణం ఫ్లోరైడ్ నీళ్ళే అని తీర్మానించేసి, నీళ్ళని శుభ్రపరచే ఒక పెద్ద ప్లాంట్ కట్టడం అనే ఒక మహాయఙ్ఞానికి శ్రీకారం చుడతాడు. ఇంక ఆ ప్లాంట్ కి విలన్స్ అడ్డు పడడం, హీరో వాళ్ళని ఎదిరించడం, ఇవన్నీ మమూలే . హీరో కూడాఈ ప్లాంట్ పని మీద కలెక్టర్ ని, హోం మినిస్టర్ ని, ఇంకా ఛీఫ్ మినిస్టర్ ని, గవర్నర్ ని, రాష్ట్రపతి నీ కలవడానికి ఢిల్లీ దాకా వెళతాడు. ఢిల్లీ వెళ్ళి పర్మిషన్ లు అన్నీ తెచ్చి ఇక పని మొదలెట్టే టైం కి సి.బి.ఐ, ఎఫ్.బి.ఐ, ఇంటర్-పోల్,స్కాట్లాండ్ పోలీస్, అందరూ వచ్చి హీరో ని 'యు ఆర్ అండర్ అరెస్ట్' అంటారు. 'బట్ వై' అంటుంది హీరో భార్య. "ఇతను మీ అందరికీ శివయ్య నాయుడి గానే తెలుసు. కానీ పోలీస్ ప్రపంచానికి ఇతనెవరో తెలుసా????? మాఫియా డాన్ 'షేక్'. ప్రపంచవ్యాప్త నెట్-వర్క్ కలిగిన డాన్ షేక్ ఇతనే" .

ఫ్లాష్ బాక్ లో ఫ్లాష్ బాక్:

7 ఏళ్ళ వయసు లో ముంబై వెళ్ళిన శివయ్య ముందు కూలీ గా, తర్వాత చిన్నమోస్తరు రౌడీ గా మారి అనుకోని పరిస్థితుల్లో డాన్ అవుతాడు. అయితే తన భార్య కి ఈ విషయం తెలీదు. మాఫియా డాన్ గా వుండి ముంబై స్లం లో వాళ్ళకి ఆయన చేసిన సేవ కార్యక్రమాలు, ఆయన మాఫియా వ్యవహారాలు, ముంబై లో తనకి ఆశ్రయం ఇచ్చిన ముస్లిం లీడర్ 'షేక్' అనే పేరు పెట్టడం వగైరా వగైరా మీరు ఈ సెకండ్ ఫ్లాష్ బాక్ లో చూస్తారు.

ఇక హీరో ని అరెస్ట్ చేసి తీసుకెళుతున్న పోలీసులకి చీఫ్ మినిస్టర్, ప్రైం మినిస్టర్, ఫారిన్ అఫైర్స్ మినిస్టర్ ఫోన్ చేసి శివయ్య ని విడిచి పెట్టమని, శివయ్య ఆల్రెడీ ఈ విషయాలన్నీ తమతో చర్చించాడనీ, ఇప్పుడతనికి ఎలాంటి మాఫియా కనెక్షన్లు లేవనీ, పైగా ఇప్పుడతను చేస్తున్న మహా యఙ్ఞం వల్ల 4 జిల్లాలు బాగుపడతాయనీ చెప్పడం తో సి.బి.ఐ, ఎఫ్.బి.ఐ, ఇంటర్-పోల్ ఓ.కె. అంటారు. అయితే స్కాట్లాండ్ పోలీసులు ముందు కన్విన్స్ అవ్వరు. అప్పుడు ప్రైం మినిస్టర్ - 'ధర్మో రక్షితే రక్షితః' అన్న సామెతని ,దాని మీనింగ్ ని డిటెయిల్డ్ గా వివరించాక స్కాట్లాండ్ పోలీసులు కూడా కన్విన్స్ అయి వదిలేస్తారు. (ఆ ..మరిచి పోయా - అప్పుడు అక్కడున్న పోలీసుల్లో ఒకడే - తర్వాత ఐ.పి.ఎస్. అయిన పట్నాయక్).

అయితే హీరో వెనక్కి వెళ్ళేసరికే విలన్స్ ప్రెగ్నెంట్ గా వున్న హీరోయిన్ కడుపు లో క్యిబా క్యిబా అని తన్ని చంపేస్తారు. భార్య చనిపోయిందని హీరో, హీరో కి వంశాంకురం లేకుండా పోయిందని ప్రక్క వాళ్ళూ బాధ పడుతూ అంత్యక్రియలకి ఏర్పాట్లు చేస్తుంటారు. అప్పుడే ఒక సెన్సేషనల్ సీన్ జరుగుతుంది.ఉన్నట్టుండి ఒక ముసలవిడ గట్టిగా అరుస్తుంది - 'పొట్ట కదులుతోంది రా' అని. ముసలోళ్ళంతా వచ్చి, చనిపోయిన హీరోయిన్ కడుపు ని కోసి, అందులోనుంచి బ్రతికి వున్న హీరో వంశాంకురాన్ని బయటికి తీస్తారు. బ్యాక్-డ్రాప్ లో "పులి బిడ్డ, సిం హం బిడ్డ, చావు ని ఎదిరించి పుట్టినోడు " ఆ టైప్ పాట.ఇంక హీరో - విలన్స్ లో దొరికినవాళ్ళందరినీ చంపేసి, భార్య ఙ్ఞాపకాలతో అకడ వుండలేక ఒరిస్సా కి (ఈ మధ్య ఒరిస్సా లో తెలుగు సినిమా ల కి మార్కెట్ బాగుంది) వెళ్ళి అక్కడ జిం పెట్టుకుంటాడు.


ఇంక క్లైమాక్స్ ఏముందీ, బ్యాలన్స్ మిగిలిన ఒక ఫ్యాక్షనిస్ట్ విలన్ వచ్చి హీరో కొడుకు ని సీమ కి ఎత్తుకెళితే హీరో మళ్ళీ సీమ కి వెళ్ళి మళ్ళీ ఫైట్ చేసి విలన్ ని చంపి, ఇంక ఫ్యాక్షన్ వద్దు. వయొలెన్స్ వద్దు. అహింసా పరమో ధర్మః, ధర్మో రక్షితే రక్షితః అని మెసేజ్ ఇచ్చి, సెకండ్ హీరోయిన్ ని చేసుకోడం తో కథ ముగుస్తుంది.
********************
ఉపసంహారం
మా డిస్కషన్స్ ఇలా జోరుగా సాగుతుండగా దఢేల్ మని తలుపు తెరుచుకుని వచ్చాడు మా క్లాస్మేట్ - 'ఏంటి బాసూ సీరియస్ డిస్కషన్స్?? ' అంటూ.'ఏం లేదు రా. ఫ్యాక్షన్ సినిమా కథ ఒకటి వండుతున్నాం - షేక్ సెబాస్టియన్ నాయుడు అని టైటిల్.'
టైటిల్ తప్ప ఒక్క ముఖ్ఖ ఎక్స్ ట్రా చెప్పకుండానే మా వాడికి స్టొరీ మొత్తం అర్థం అయిపోయింది-
'సీమ సబ్జెక్ట్ లో మత సామరస్యం మెసేజ్. గుడ్. సో రెండు ఫ్లాష్ బాక్ లన్న మాట.కథ కి మరింత పరిపూర్ణత్వం రావడానికి ఒక చిన్న సజెషన్. '

'చెప్పు ' అన్నాం.
'ఇంకో రెండు చిన్న ఫ్లాష్ బాక్ లు చెబుతా. చెరొక 4 నిమిషాలు వుంటాయి.సినిమా లో మీ బుద్ది పుట్టిన చోట వాటిని యాడ్ చేయొచ్చు. ' అని ఆ రెండు ఫ్లాష్ బాక్ లు చెప్పి వాటికి తగ్గట్టు టైటిల్ కూడా లైట్ గా మార్చి వెళ్ళిపోయాడు. వాడు చెప్పిన ఫ్లాష్ బాక్ లు ఏంటి అనేది మీ ఊహ కే (విఙ్ఞత కే ) వదిలేస్తున్నా. వాడు ఫైనల్ గా చెప్పిన టైటిల్ ఇది.
'షేక్ సెబాస్టియన్ నాయుడు సింగ్ దలైలామా'

పండగ చేసుకోండి.(క్రిస్మస్, జనవరి 1st తర్వాత సంక్రాంతి)

ఐ నో హిందీ బెటర్ దెన్ హిం.

నా ఫ్రెండ్స్ లో చాలా మంది తమిళియన్స్ వున్నారు. వాళ్ళందరికీ కామన్ గా తమిళ బాష లో నచ్చని ఒకే ఒక్క డైలాగు - 'హిందీ తెరియుమా?' . వీళ్ళందరూ ఈ పుణె శహర్ లో ఇన్నేసి నెలలు/సంవత్సరాల నుండి ఎలా నెట్టుకొచ్చేస్తున్నారని నాకు తెగ డౌట్ వుండేది. ..!!

అప్పట్లో చెన్నై లో ఒకబ్బాయి తగిలాడు. పుణె లో జాబ్ వచ్చింది- నాతో పాటు -అతనూ సేం డే జాయినింగ్, సేం ఫ్లైట్. సరే, ఎయిర్-పోర్ట్ లో కలుద్దాం అని చెప్పా. ఉదయం 7కి ఫ్లైట్ అయితే 5:30 కి నేను మా ఫ్రెండ్ ఒకబ్బాయి (మాత్రమే) ఎయిర్-పొర్ట్ కి వెళ్ళాం. అక్కడికెళ్ళగానే R.B చౌదరి సినిమా లొ క్లైమాక్స్ షాట్ లాగా ఫ్రేం నిండా జనాలు. ఆ అబ్బాయి వాళ్ళ పేరెంట్స్, వాళ్ళ అన్న వాళ్ళ ఫ్యామిలీ, వాళ్ళ అక్క వాళ్ళ ఫ్యామిలీ, వాళ్ళూ వీళ్ళూ అబ్బో. అందరూ సేం క్వొశ్చన్ నన్ను - హిందీ తెరియుమా అని. నాకేమో హిందీ తెరియుం. కానీ ఆ విషయం వాళ్ళకి చెప్పడానికి తమిళే తెరియాదు. .! సరే, వాడేమో పుణె వచ్చాక - 'భయ్యా, సైడ్ పే రుకో' అన్న ఒకే ఒక్క సెంటెన్స్ నేర్చేసుకుని - దాంతోనే, వున్నన్ని రోజులూ పుణె ఆటో వాళ్ళని 'గడగడలాడించి' తర్వాత US వెళ్ళిపోయాడు. .!

మా రూం లో ఇంకొక అబ్బాయి వుండేవాడు. తెలుగే కానీ- కుర్రాడి బాల్యము, విద్యాభ్యాసము, బారిష్టర్ చదువులూ మొత్తం చెన్నై లో జరగడం వల్ల హిందీ ఒక్కముక్క కూడా రాకుండా పోయింది. జాబ్ సెర్చింగ్ గురించి పుణె వచ్చాడు. మేమంతా ఆఫీస్ కెళ్తే రూం లో ఒక్కడే వుండేవాడు. వాడికి హిందీ లో 'క్యా' అనే ఒకే ఒక్క పదం (సారీ.. అక్షరం) తప్ప ఏమీ రాదు. అసలు మేమెవరూ లేనప్పుడు పనామె తో హిందీ ఎలా మేనేజ్ చేస్తాడనేది మా పాలిటి కో సస్పెన్స్ థ్రిల్లర్. కూపీ లాగడానికి ఎన్ని సార్లు ఎంత స్ట్రాంగ్ గా ట్రై చేసినా అంత కంటే 'స్ట్రాంగ్' గా ఎదుర్కొనేవాడే తప్పించి విషయం చెప్పేవాడు కాదు. అట్టాంటిది ఒకానొక 'వీక్'ఎండ్, రూం లో కరెంట్ పోయి, 'పిల్ల ' గాలి కోసం మిద్దె మీదకెళ్ళినప్పుడు విషయం చెప్పాడు- మొదట్లో ఆమె ఏమడిగినా క్యా, క్యా అని తప్ప మరో మాట మాటాడకపోవడం తో ఆమే సూక్ష్మం గ్రహించేసి ఒక పుష్పకవిమానం టైప్ సైగబాష కి ఫిక్స్ అయిపోయిందంట. ఇప్పుడూ..రూం లో నీళ్ళు అయిపోయాయనుకోండి..ఆమె డైరెక్ట్ గా వెళ్ళి ఖాళీ బకెట్ ఒక దాన్ని పైకి ఎత్తి ధభేల్ మని కింద పడేసి (నీళ్ళు లేవన్నట్టుగా) చేతులు వూపుతుందంట (మా రూం లో నీళ్ళకు - బోర్ . మేమే మోటార్ వేయాలి). అప్పుడూ..మా వాడేమో గబగబా ఫ్యాన్ స్విచ్ దగ్గరికి వెళ్ళి స్విచ్ వేసి - తిరగని ఫ్యాన్ వైపు చూపిస్తూ(కరెంట్ లేదన్నట్టు) చేతులు వూపుతాడంట. అదీ సంగతి. అలా మా వాడు కొన్నాళ్ళు 'డంబ్ చారడ్శ్ ' లో ప్రావీణ్యం సంపాదించాక చివరికి బెంగళూర్ వెళ్ళిపోయాడు.

ఇక ఆఫీస్ లో ఇద్దరు ఫ్రెండ్స్ వున్నారు. ఇద్దరూ తమిళే. వాళ్ళిద్దరూ ఆపుడప్పుడూ హిందీ లో మాట్లాడుకుంటారు - లాంగ్వేజ్ స్కిల్స్ ఇంప్రూవ్ చేసుకుందామని. అబ్బో. వాళ్ళు 'నీఛే' ప్లేస్ లో 'పీఛే' , 'పీఛే' ప్లేస్ లో 'నీఛే' పెట్టి మాట్లాడే హిందీని ఏ ఇ.వి.వి సత్యనారాయణ లాంటోడో గనక వింటే ..చచ్చారే.. సెన్సార్ వాళ్ళు..!! వాళ్ళిద్దరికీ మళ్ళీ కాంపిటీషన్. నా హిందీ బాగుందంటే నాది బాగుందని.
ఒక సారి వాళ్ళలో ఒకతనన్నాడు మాతో , రెండో అతన్ని ఉద్దేశ్యించి - 'హే, ఐ నో హిందీ బెటర్ దెన్ హిం యార్ ' అని.
"ఒరే నువ్విదే ముక్క హిందీ లొ చెప్పరా - మేమంతా ఒప్పేసుకుంటాం, యు నో హిందీ బెటర్ దెన్ హిం అని" అని చెప్పా. ఖంగుతిన్నాడు.!!

టాలీవుడ్ గీతాంజలి..

( టాగూర్ గీతాంజలి కి పేరడి - తెలుగు చలనచిత్ర జగత్తు నేపథ్యం లో ..సారీ.. టాలీవుడ్ బ్యాక్-డ్రాప్ లో ..)

ఎచ్చట ప్రెగ్నెన్సీ లో ఉన్న హీరో చెల్లి డొక్క లో విలన్ లు 'క్యిబా క్యిబా' అని తన్నరో..
ఎచ్చట హీరో డైరీ ని హీరోయిన్ క్లైమాక్సు కు ముందు మాత్రమే చదవదో..
ఎచ్చట పాకిస్తానీ తీవ్రవాదులు పరవస్తు చిన్నయసూరి కంటే స్పష్టమైన తెలుగు మాట్లాడరో..
ఎచ్చట డిగ్రీ కాలేజీ ఇన్స్పెక్షన్ కి డి.ఈ.వో. లు రారో..
ఎచ్చట పేషెంట్స్ కి 'కేన్సర్- లుకేమియా ' కాక వేరే జబ్బులు కూడా వస్తుంటాయో..
ఎచ్చట మరణగోగుల సంగీతం ఉండదో..
ఎచ్చట 'టెక్నికాలిటీ ' అంటే స్టడీకామేసుకుని సందుల్లో పరిగెత్తటం మాత్రమే కాదో..
ఎచ్చట 'నిర్-మాత ' అంటే తను తీసిన సినిమా ని 'అమ్మ-లేని ' వాడు అని అర్థం కాదో..
అట్టి స్వేచ్ఛామయ స్వర్గధామం లోకి ఈ టాలీవుడ్ ని నడిపించు తండ్రీ..!!

Tagore's original poem..

WHERE the mind is without fear and the head is held high
Where knowledge is free
Where the world has not been broken up into fragments By narrow domestic walls
Where words come out from the depth of truth
Where tireless striving stretches its arms towards perfection
Where the clear stream of reason has not lost its way Into the dreary desert sand of dead habit Where the mind is led forward by thee Into ever-widening thought and action
Into that heaven of freedom, my Father, let my country awake.

నమ్మొద్దు రా నమ్మొద్దు తెలుగు వాడిని!

ఐ.టి. లో పనిచేసే కొంతమంది తెలుగు ఫ్రెండ్స్ ని చూసాక సరదా గా వ్రాసింది...

నమ్మొద్దు రా నమ్మొద్దు తెలుగు వాడిని!

ఏంట్రా ఈ జీవితం అంటాడు,
వేస్ట్ లైఫ్ రా మనది అంటాడు,
ఐ.టి లో నో, ఐ.ఐ.టి లో నో ఉంటాడు !!
నమ్మొద్దు రా నమ్మొద్దు తెలుగు వాడిని!

'మనం వేస్ట్ రా బాబూ..' అంటాడు,
మనకి లైఫ్ ప్లానింగ్ అస్సలు చేతకాదంటాడు,
ఊరిలో వంద ఎకరాలు కొంటాడు
నమ్మొద్దు రా నమ్మొద్దు తెలుగు వాడిని!

'అమ్మాయిలొద్దురా బాబూ - టార్చర్ ఫెలోస్' అంటాడు
అయినా మనకెందుకు రా అమ్మాయిలు అంటాడు
రాత్రి మినిమమ్ రెండు గంటలు సెల్ లో 'సొల్లు'తాడు
నమ్మొద్దు రా నమ్మొద్దు తెలుగు వాడిని!

ఫ్రెండ్ ఫొన్ చేస్తే, ఐ.టి. లోకి రావద్దంటాడు
వర్క్ లోడ్ ఎక్కువంటాడు - జాబ్ సెక్యూరిటి తక్కువంటాడు
వచ్చావంటే నీ లైఫ్ 'ఖండం అయిపొద్ది' అంటాడు
వీడేమో ఆన్ సైట్, H1 తప్ప వేరే ఏమీ ఆలోచించడు!!
నమ్మొద్దు రా నమ్మొద్దు తెలుగు వాడిని!

'ఎదవ జీవితం ' - పెళ్ళి కూడా కావట్లేదంటాడు
అమ్మాయి దొరకట్లేదంటాడు - అయినా మనకెవడిస్తాడంటాడు
ఇంట్లో వాళ్ళు 'మ్యాచ్' చూపిస్తే ఫ్లాట్, కార్ కొన్నాకే పెళ్ళి అంటాడు
నమ్మొద్దు రా నమ్మొద్దు తెలుగు వాడిని!

నేను 'కూల్-డ్యూడ్' ని అంటాడు
నేను జాలి క్యాండిడేట్ అంటాడు
పని ఒక్కటే లైఫ్ కాదంటాడు
ఉదయం 8 కి ఆఫీస్ కి పోతే రాత్రి 11 అయినా బయటికి కదలడు
నమ్మొద్దు రా నమ్మొద్దు తెలుగు వాడిని! !!

త్రివిక్రం డైలాగులు

ఈ మధ్య ఎవడైనా మంచి పంచ్ ఒకటి విసిరితే చాలు - ఏంటి బాసూ త్రివిక్రం స్కూల్ లో జాయిన్ అయ్యావా అంటున్నారు జనాలు. ఇప్పుడంటే త్రివిక్రం ట్రెండ్ నడుస్తోంది కానీ నేను ఇంజినీరింగ్ చదివేటప్పటికి ఇంకా త్రివిక్రం సినిమాల్లోకి రాకపోవడం వల్ల అప్పట్లో మా ఫ్రెండ్స్ అంతా 'ఇ.వి.వి. స్కూల్ ' లో డిస్టెన్స్ ఎడ్యుకేషన్ కోర్స్ చేసేవాళ్ళు. అప్పటి సంగతులు.

1. ఒక సారి మా ఫ్రెండ్ వాళ్ళ కజిన్ వాళ్ళ రిలేటివ్ వాళ్ళ తెలిసినతనికి అన్న వరస ఒకాయనకి క్యాంపస్ లో పని వుంటే మా రూం లో దిగాడు. మా రూం లో మిగతా వాళ్ళూ ఒకే బ్రాంచ్ అవడం తో సబ్జెక్ట్ కి సంబంధించిన బుక్స్ చాలా వుండేవి- నీట్ గా వుండేవి కూడా, ఎవరూ పెద్దగా టచ్ చేయకపోవడం వల్ల. వచ్చినతను రాగానే రూం ని పుస్తకాలనీ చూసాడు. బాగా చదువుకునే టైప్ క్యాండిడేట్ అనుకుంటా- అన్నేసి పుస్తకాలు చూసేసరికి తెగ ముచ్చట పడ్డాడు.

అతనన్నాడు - 'మీ రూం లో బుక్స్ కలెక్షన్ బాగా వున్నట్టుందే ' .
ఠకీమని రిప్లై వచ్చింది ఒక మూల నుంచి- ' కలెక్షన్ బాగానే వుంటది, కానీ వాటితో మాకు కనెక్షనే - అస్సలుండదు '.

2. ఇంకొకసారి ఇంజినీరింగ్ అప్పుడే- మా ఫ్రెండ్ వచ్చి అన్నాడు -
'బాసూ నేను రూం మారుదామనుకుంటున్నాను. ఆ సైకో గాడి తో కలిసి నేను ఉండలేను.'
నేనేమో అప్పటికే 'ఇంద్ర-బార్న్ ఫర్ పీపుల్ ' లాగా చాలా మంది ని రూం లో అడ్జస్ట్ చేసి వుండడం తో మా రూం కిటకిటలాడుతూండేది. మరి మా రూం కి వస్తానంటాడేమో అని అన్నానో లేక క్యాజువల్ గా అన్నానో గుర్తు లేదు కానీ, అన్నాను-
'వాడి గురించి తెలిసిందే కదా, నువ్వే కొంచెం సర్దుకుపోవాలి '.
వెంటనే అన్నాడు మా వాడు- " వాడి గురించి 'తెలిసింది ' అందుకే 'సర్దుకుని ' పోతున్నాను ".

3. మా మెస్ లో ఒక వర్కర్ వుండేవాడు. బాగా సోమరి. రోజూ ఒకే గళ్ళ చొక్కా వేసుకుని వచ్చేవాడు. వడ్డించేటపుడు మా ఫ్రెండ్ అడిగాడు-
'ఇవాళేంటి కర్రీ' అని.
'ఇవాళ (కూడా) ముల్లంగి సార్ ' అన్నాడు.
మా వాడు అన్నాడు కొంచెం చిరాకుగా - ' కొంచెం మార్చండయ్యా- రోజూ ఈ ముల్లంగి నీ, నీ గళ్ళంగి నీ చూడలేక చచ్చిపోతున్నాం ' .

4. ఇంకొకటి. ఓ సారి మా రూం-మేట్ ఒకబ్బాయి అన్నాడు.
"జుట్టు బాగా తెల్లబడింది. ఇవాళ హెయిర్ డై అయినా వేసుకోవాలి".
ప్రక్కన అబ్బాయి అన్నాడు- " ఇవాళ వద్దులే ఇంకెప్పుడైనా వేసుకో ".
"ఏం? ఎందుకలాగా?" .
" అంటే..'డై అనదర్ డే' అన్నారు కదా అందుకని.." .

సినిమా వాళ్ళ మాటలకి అర్థాలే వేరులే!!

సినిమా వాళ్ళ తెలుగు, మనం మామూలు గా మాట్లాడుకునే తెలుగు రెండూ ఒకటేనన్న పెద్ద అపోహ లో వుంటారు చాలామంది. చాలా పొరపాటది. దానికీ దీనికీ రాధిక కి సాధిక కి ఉన్నంత తేడా ఉంది. సినిమా వాళ్ళు మాట్లాడే మాటల వెనుక వుండే అసలు అర్థం తెలియాలంటే కొంచెం జాగ్రత్త గా పరిశీలించాలి.

ఉదాహరణకి సినిమా వాళ్ళు ప్రెస్ మీట్ లో, ఇంటర్వ్యూ లో మాట్లాడే కొన్ని సినిమా తెలుగు మాటలని సాధారణ తెలుగు లోకి డబ్బింగ్ చేస్తే సారీ ట్రాన్స్ లేట్ చేస్తే ఇలా ఉంటాయి. (సినిమా వాళ్ళ తెలుగు ని, దాని ప్రక్కనే తెలుగు లో ఆ వాక్యం అసలు మీనింగ్ ని గమనించగలరు)

ప్రెస్ మీట్ - సినిమా మొదలెట్టే మందు:

కథే హీరో - హీరో గా ముక్కూ మొఖం(లేని)తెలీని సన్నాసిగాణ్ణి పెట్టాం.
ఈ సబ్జెక్ట్ ఇంతవరకు ఇండియన్ స్క్రీన్ మీద రాలేదు - ఈ సారి ఎవరికి తెలీని ఇరాన్ సినిమా ని కాపీ కొట్టాం.

పక్కా స్క్రిప్ట్ తో మొదలెడుతున్నాం - స్టోరీ లైన్ రెడీ అయింది

ప్రెస్ మీట్ - సినిమా రిలీజ్ కి ముందు:

మా డైరెక్టర్ మేమనుకున్న దాని కంటే బాగా తీసాడు - వీడు ఈ మాత్రం తీస్తాడని అనుకోలేదు ముందు.
స్క్రీన్ ప్లే చాల ఫాస్ట్ గా వుంటుంది - పెద్ద స్టోరీ ఏమీ ఉండదు.
రీమేకే అయినా నేటివిటి మార్పులు చాలా చేసాం - ఫస్ట్ సాంగ్ మూడో స్టెప్ లో హీరో లుంగీ కి బదులు ప్యాంట్ వేసుకుంటాడు.

రిలీజ్ అయ్యాక -

మొదట్లో డివైడెడ్ టాక్ వినిపించింది - ఫస్ట్ డే మార్నింగ్ షో చూసిన వాళ్ళు బండబూతులు తిట్టారు.
స్లో గా పికప్ అవుతోంది- కౌంటర్ లో ఈగలు తోలుకుంటున్నారు.
సినిమా చూసిన వాళ్ళంతా టెక్నికల్ గా చాలా బాగుందంటున్నారు - సినిమా ఓవరాల్ గా ఛండాలంగా వుందంటున్నారు.
సినిమా విశ్లేషకుల అంచనాలను తలకిందలు చేసి, ట్రేడ్ పండితులని ఆశ్చర్యపరిచింది- చెత్త సినిమా నే, కానీ (అక్కడక్కడా) ఆడుతోంది, ఎందుకో తెలీదు.